نذرِ جذبی ۔۔۔۔ منیب الرحمٰن

(۲۰۰۲ء کے اواخر میں جب میں علی گڑھ گیا تو مجھے عرصۂ دراز کے بعد اپنے شفیق دوست معین احسن جذبی سے ملنے کا موقع ملا۔ یہ نظمیں اسی ملاقات کی یادگار ہیں)

باز جست

چلو کہ شہرِ فراموش کا نشاں ڈھونڈیں

وہ بام و در، وہ گلی کوچے، وہ مکاں ڈھونڈیں

گئے دنوں کے جوآثار چھوڑ آئے تھے

سراب وقت میں ان کو یہاں وہاں ڈھونڈیں

ملا نہ کوئی کہ دل کی زباں سمجھ سکتا

بیان غم کے لئے کوئی ہم زباں ڈھونڈیں

سیاہ رات، کڑی آزمائشیں در پیش

چراغِ صبر لیے منزلِ نہاں ڈھونڈیں

غبار ہی میں بھٹکتے رہیں گے یوں کب تک

مسافروں سے کہو، چل کے کارواں ڈھونڈیں

بلا کا شور ہے، ہیجان ہے، تباہی ہے

اس انتشارِ جنوں سے کہاں اماں ڈھونڈیں

کہاں وہ قول بہار، اعتماد ہو جس پر

کہاں وہ مژدۂ گل، جس کا گلستاں ڈھونڈیں

وہ پیڑ کٹ گئے یا آندھیوں کی نذر ہوئے

کہاں پہ طائرِ آوارہ آشیاں ڈھونڈیں

ہجوم غیر میں کس کس سے راستہ پوچھیں

پرائے دیس میں کس کس کا آستاں ڈھونڈیں

بنائیں دیدۂ گریاں کو ترجماں اپنا

رموزِ درد جو سمجھے، وہ راز داں ڈھونڈیں

غم حیات جو اک بے کراں سمندر ہے

عبور کرنے کو اک عشقِ بے کراں ڈھونڈیں

کسی کے سوگ میں آنکھوں کو ابر بار کریں

کسی کے رنج میں جاں سوزیِ فغاں ڈھونڈیں

حکایتیں ہوں جہاں غم کشانِ الفت کی

اسی کتاب میں اپنی بھی داستاں ڈھونڈیں

دوام اگر ہے کسی کو تو بس محبت کو

ثباتِ عشق میں اک عمرِ جاوداں ڈھونڈیں

٭٭٭

باز یافت

جو کبھی چھوٹ گیا، پھر وہ زمانہ مل جائے

گر کسی روز کوئی دوست پرانا مل جائے

حسنِ صحبت میں محبت کی کشش ہو ایسی

عمرِ رفتہ کو پلٹنے کا بہانہ مل جائے

جی اٹھیں خاطرِ ویراں میں گزشتہ یادیں

راہ چلتے کو خرابے میں خزانہ مل جائے

ذکر ہو اہلِ طریقت کے بچھڑ جانے کا

حال دل کہنے کو یہ غم کا فسانہ مل جائے

اپنے سوئے ہوئے لمحات کے تہہ خانے میں

چشمِ بیدار کو اک خواب سہانا مل جائے

جذبِ احساس ستاروں سے بصارت چاہے

گرمیِ قلب کو پھر سوزِ شبانہ مل جائے

دفعۃً چھیڑ دے پھر کوئی ترنم سے غزل

مثل اک شمعِ فروزاں یہ ترانہ مل جائے

یہ وہ منزل ہے کہ سرگردیِ دوراں کو جہاں

سانس لینے کے لئے ایک ٹھکانہ ملا جائے

٭٭

شعر و حکمت، حیدر آباد ہند، کتاب ۶، مارچ ۲۰۰۴ء، مدیر: اختر جہاں، مرتبین: شہریار، مغنی تبسم

٭٭٭