وہ کیسا سحرِ وجود تھا۔۔۔
بیکراں خلاؤں سے کیسی آواز آ رہی تھی
وہ کیسا آغاز تھا۔۔۔۔ وہ کیا تھا
وہ کون سا رنجِ نا رسائی تھا
حزن ہستی تھا۔۔۔۔۔۔۔
یا سیہ بحرِ بیکراں تھا
جہاں مرے روز و شب کا درد آشنا سفینہ سا بہہ رہا تھا۔۔۔۔۔۔
وہ کیسا بہتا ہوا سا غم تھا
کہ خود بخود لمحۂ مسرت میں ڈھل گیا تھا۔۔۔۔۔
وہ کیسا طوفان تھا۔۔۔۔۔
جو سکوت و ثبات کا رمز بن گیا تھا
وہ ایک افسوں تھا۔۔۔ ایک اقرار تھا
اک اثباتِ آرزو تھا۔۔۔۔۔
کہ جیسے خود کائنات آواز دے رہی تھی
ازل کی وہ گونج تھی
جو ہستی پہ چھا رہی تھی
’میوز’٭ ذہن و دل و نظر سے عجیب چشمک سی8 کر رہی تھی
کہ قلب میں برق کوندتی تھی۔۔۔۔
کہ آسمانوں سے۔۔۔۔ یا۔۔۔۔۔
کہکشاں کے زینے سے
رمز باطن اتر رہی تھی
خدا کی آواز آ رہی تھی۔۔۔۔
میں کانپتی تھی۔۔۔ کہ
میرے اطراف سب زمیں و زماں کے آثار کانپتے تھے
قلم کی حرکت میں۔۔۔۔
خود وجود و عدم کے اسرار کانپتے تھے
٭٭
٭ میوز۔ یونانی دیومالا کی رو سے شاعری کی دیوی
آج کل، نئی دہلی، مارچ ۲۰۰۸ء، مدیر: خورشید اکرم
٭٭٭