بسے کہ اجڑے وہ بازار ہر طرف تو کیا
اگر ہمیں رہیں سردار ہر طرف تو کیا
مزا تو تب ہے کہ جانیں وہ میرے دل کا حال
ہوئے ہیں جمع اگر یار ہر طرف تو کیا
ہماری آنکھ تک آئے کوئی تو لمحۂ لطف
محبتیں ہیں اگر ثمر بار ہر طرف تو کیا
یقیں بھی ہے تجھے وہ سرانا کے قابل ہیں
کلف سے اونچی ہے دستار ہر طرف تو کیا
ہے کوئی ایسا بھی دیکھے جو دیدۂ تر سے
بہت ہیں گنتی میں زر دار ہر طرف تو کیا
ہر ایک پہلو سے خم ہیں ہمارے سر بھی یہاں
جو سونت رکھی ہے تلوار ہر طرف تو کیا
اگر ہے دھوپ تو کچھ اپنے لوگ بھی ہیں طورؔ
نہیں ہے سایۂ دیوار ہر طرف تو کیا
٭٭
قرطاس، ناگپور، مئی جون ۲۰۰۶ء، مدیر: محمد امین
بہت مشکل تھی آسانی سے پہلے
سمندر ریت تھا پانی سے پہلے
اسے کوئی کہاں پہچانتا تھا
مری آنکھوں کی حیرانی سے پہلے
بہت آباد تھا دل سا مکاں بھی
محبت کی ستم رانی سے پہلے
وہ دن بھی تھے بہت ہنستی تھی آنکھیں
جہاں کی قہر سامانی سے پہلے
کوئی توقیر صادق تھی کہیں پر
یہ دریا چپ تھا طغیانی سے پہلے
حوالے منجمد سے ہو رہے ہیں
سبھی رشتوں کی ارزانی سے پہلے
خود اپنے آپ کو پہچانتا طورؔ
کسی بھی کارِ لافانی سے پہلے
٭٭٭
تفہیم، مدیر: شیخ خالد کرار
کہاں کسی پہ بھلا مہرباں ہے کوچۂ خاک
خود اپنے آپ میں اک امتحاں ہے کوچۂ خاک
جڑے ہوئے ہیں سر اک دوسرے سے آپس میں
زمین صفر پہ کیا آسماں ہے کوچۂ خاک
میں آج بھی ہوں اسیر طلسم کتبہ عشق
مرے وجود کو نقش مکاں ہے کوچۂ خاک
ہمارے خوں سے ہے سر سبز کاروبار جہاں
کہاں ہے کوچۂ خاک اب کہاں ہے کوچۂ خاک
ہمارے اشکوں کی خاطر ہے ارض چشم وجود
ہمارے سر کے لئے آستاں ہے کوچۂ خاک
یہ ناصبوری مرے اپنے اختیار سے ہے
ہر آدمی سے ہوں کہتا کہاں ہے کوچۂ خاک
کسی نگاہ سکوت آشنا کی رمز ہے طور
کسی حکایت دل کا بیاں ہے کوچۂ خاک
٭٭
ثنا کہ سنگ ملامت برا نہیں لگتا کچھ
ہوں ایسے حال میں اب تو خدا نہیں لگتا کچھ
نظر میں رنگ نظر صفر کیا ہوئے ہیں کہ اب تو
صدا میں منصب حرف صدا نہیں لگتا کچھ
وہ شہد وصل یہاں ہو کہ زہر ہجر محبوب
مری نگاہوں کو اچھا برا نہیں لگتا کچھ
نہ جانے کب سے اٹھائے ہوئے ہیں ہاتھوں کوہم
کھلا ہوا ہو وہ باب عطا نہیں لگتا کچھ
کروں میں مقطع سے اے طور آب سخن کا آغاز
نہ ہو نشانے پہ سنگ صدا نہیں لگتا کچھ
٭٭
ادب ساز، شمارہ ۲، جولائی تا ستمبر ۲۰۰۶ء، مدیر نصرت ظہیر
٭٭٭