غزلیں ۔۔۔ انور سدید

 

 

۔۔۔۔۔۔۔۔۔۔۔۔۔۔۔۔۔۔

بدلتے دیکھ کر تیور اچانک

ہوا محسوس اُبھرتا شر اچانک

 

میں اپنی زندگی قربان کر دوں

اگر وہ دیکھ لے مُڑ کر اچانک

 

اسی کی جستجو برسوں رہی ہے

کھلا ہے آج جو منظر اچانک

 

زمیں کی ایک جنبش کا اثر ہے

کہ گرتے جا رہے ہیں گھر اچانک

 

وطن پردیس میں جب یاد آیا

اُبھر آیا نظر میں گھر اچانک

 

جو بچھتا جا رہا تھا میرے آگے

وہ بندہ بن گیا افسر اچانک

 

محبت کے محل سے آج انورؔ

گرا ہے سر پہ اک پتھر اچانک

۔۔۔۔۔۔۔۔۔۔۔۔۔۔۔۔۔۔

 

۔۔۔۔۔۔۔۔۔۔۔۔۔۔۔۔۔۔

اندھے غار سے نکلو، بارش تھم گئی ہے

باہر دنیا دیکھو، بارش تھم گئی ہے

اندر جتنا شور تھا، اب بھی جاری ہے

خود یہ شور سمیٹو، بارش تھم گئی ہے

سب تعبیریں خوابوں کی منہ زور ہوئیں

ان پر مُہر لگا دو، بارش تھم گئی ہے

زیست کے منظر، آنکھیں کھول کے دیکھ لیے

آنکھ پہ پٹی باندھو، بارش تھم گئی ہے

وقت طناب پہ انور لرزہ طاری ہے

وقت طناب کو روکو ، بارش تھم گئی ہے

۔۔۔۔۔۔۔۔۔۔۔۔۔۔۔۔۔۔

 

 

 

۔۔۔۔۔۔۔۔۔۔۔۔۔۔۔۔۔۔

تو بھی کر غور اس کہانی پر

جو لکھی جا رہی ہے پانی پر

 

یہ زمیں زر اُگائے گی اک دن

رکھ یقیں اپنی کلبہ رانی پر

 

نہر کے محکمے میں گزری عمر

ملا ایوارڈ* حکمرانی پر

 

گرچہ مشکل تلاش تھی اس کی

گھر ترا مل گیا نشانی پر

 

اس کی بے محوری پہ غور نہ کر

رحم کھا اس کی بے زبانی پر

 

سفرِ زیست تھا سراب تمام

ناؤ چلتی رہی ہے پانی پر

 

قائم انور سدیدؔ نے رکھا

ارتکاز اپنی زندگانی پر

 

*صدرِ پاکستان کا "تمغۂ امتیاز” ، ۱۴اگست ۲۰۰۸ء کو دیا گیا۔

۔۔۔۔۔۔۔۔۔۔۔۔۔۔۔۔۔۔

 

۔۔۔۔۔۔۔۔۔۔۔۔۔۔۔۔۔۔

یہ مجھ سے پوچھتے ہیں یار تیرے

گزرتے ہیں کہاں اتوار تیرے

 

نظر وہ لوگ اب آتے نہیں ہیں

جو کل تھے حاشیہ بردار تیرے

 

مکاں اپنے مکیں سے پوچھتے ہیں

کہاں ہیں آج پہرے دار تیرے

 

تمہیں رُتبہ بڑا جب سے ملا ہے

ہوا میں اُڑ گئے اقرار تیرے

 

ترا دشمن تو پیہم حملہ زن ہے

گئے بیکار لیکن وار تیرے

 

مسلط شہر پر تاریکیاں ہیں

مگر روشن در و دیوار تیرے

 

تمہیں گرداب میں الجھا کے انورؔ

کہاں غائب ہوئے ہیں یار تیرے

۔۔۔۔۔۔۔۔۔۔۔۔۔۔۔۔۔۔

 

۔۔۔۔۔۔۔۔۔۔۔۔۔۔۔۔۔۔

پہلے ہٹائیں گے خس و خاشاک دوستو

پھر ہم کریں گے سر کئی افلاک دوستو

 

اس شہرِ بے وفا میں نہیں کوئی غم گسار

پھرتے ہیں لے کے دامنِ صد چاک دوستو

 

اس راہزن کو ہم نے دعائیں ہزار دیں

لوٹی ہے جس نے عشق کی املاک دوستو

 

فریاد اہلِ دل کو سنانے کے واسطے

پہنی ہوئی ہے کاغذی پوشاک دوستو

 

اب عشق کرنے کی نہیں لوگوں کو فرصتیں

الجھا رہے ہیں وقت کے پیچاک دوستو

 

پر لگ گئے ہیں آج کے انسان کو سدیدؔ

اب اُڑ رہا ہے وہ سرِ افلاک دوستو

۔۔۔۔۔۔۔۔۔۔۔۔۔۔۔۔۔۔

 

 

۔۔۔۔۔۔۔۔۔۔۔۔۔۔۔۔۔۔

میرے احوال کی خود اس نے جو پرسش کی ہے

گویا بے حال پہ اک اور نوازش کی ہے

 

کچھ نہیں چاہیے اقلیم جہاں میں مجھ کو

ہاں مگر دیدۂ بیدار کی خواہش کی ہے

 

جب کرن مہر و محبت کی نہ بیدار ہوئی

سوچتا رہ گیا کس بت کی پرستش کی ہے

 

حدِ ادراک سے آگے جو مری سوچ گئی

آپ کہہ دیں کہ مری سوچ نے لغزش کی ہے

 

ہے ترا قریۂ جاں کتنا منور انورؔ

کس نے آج آ کے ترے دل میں رہائش کی ہے

۔۔۔۔۔۔۔۔۔۔۔۔۔۔۔۔۔۔

 

۔۔۔۔۔۔۔۔۔۔۔۔۔۔۔۔۔۔

یہ اہل درد نے دل کھول کر اٹھایا ہے

خزانہ پھول نے خوشبو کا جو لٹایا ہے

 

مجھے یقیں ہے کہ اب روشنی ہی پھیلے گی

چراغ اس نے اندھیرے میں اک جلایا ہے

 

رقیب خیر منائیں اب اپنی پگڑی کی

مجھے تو اس نے بھری بزم سے اٹھایا ہے

 

تھا انتظار تو میں نے چراغ دل اپنا

کبھی جلایا، کبھی آپ ہی بجھایا ہے

 

بکھرتی جائیں گی انور سدیدؔ خوشبوئیں

کہ پھول اک ترے آنگن میں مسکرایا ہے

۔۔۔۔۔۔۔۔۔۔۔۔۔۔۔۔۔۔

 

 

۔۔۔۔۔۔۔۔۔۔۔۔۔۔۔۔۔۔

زندگی جس طرح گزاری ہے

اس پہ اب ہم کو شرمساری ہے

 

عادتاً عشق اختیار کیا

عادتاً جنگ ہم نے ہاری ہے

 

دستکیں موت دیتی رہتی ہے

زندگی آپ کی ادھاری ہے

 

رو رہی ہے زمین شدت سے

پانی برسا ہے جو وہ کھاری ہے

 

دل پہ تازہ لگا ہے زخم سدیدؔ

اور یہ زخم زخمِ کاری ہے

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے