غزلیں ۔ ۔ ۔ ندا فاضلی

___________________

برندابن کے کرشن کنھیا اللہ ہو

بنسی، رادھا، گیتا گیّا، اللہ ہو

تھوڑے تنکے تھوڑے دانے تھوڑا جل

ایک ہی جیسی ہر گوریا اللہ ہو

جیسا جس کا برتن ویسا اس کا تن

گھٹتی بڑھتی گنگا میا اللہ ہو

ایک ہی دریا نیلا پیلا لال ہرا

اپنی اپنی سب کی نیا اللہ ہو

مولویوں کا سجدہ پنڈت کی پوجا

مزدوروں کی ہیّا ہیّا اللہ ہو

٭٭٭

___________________

___________________

زمین پیروں تلے سر پہ آسماں کیوں ہے

جہاں جہاں جو رکھا ہے، وہاں وہاں کیوں ہے

یہاں تو برف گرا کرتی تھی پہاڑوں سے

تمہارے شہر کا موسم دھوں دھواں کیوں ہے

کہیں ملا جو خدا تو ضرور پوچھوں گا

کئی مکانوں کے ہوتے وہ بے مکاں کیوں ہے

تماشہ دیکھنے والے تو ہیں بہت لیکن

جسے زبان ملی ہے وہ بے زباں کیوں ہے

یزید گھوم رہا ہے یہیں کہیں شاید

نجف کی آب و ہوا پھر سے نوحہ خواں کیوں ہے

___________________

___________________

پیا نہیں جب گاؤں میں

آگ لگے سب گاؤں میں

کتنی میٹھی تھی املی

ساجن تھے جب گاؤں میں

سچ کہہ گُیّاں اور کہاں

ان جیسی چھب گاؤں میں

ان کے جانے کی تاریخ

دنگل تھا جب گاؤں میں

دیکھ سہیلی دھیمے بھول

بیری ہیں سب گاؤں میں

کتنی لمبی لگتی ہے

پگڈنڈی اب گاؤں میں

من کا سودا، من کا مول

کیسا مذہب گاؤں میں

٭٭٭

___________________

___________________

(پاکستان سے لوٹنے کے بعد )

انسان میں حیوان یہاں بھی ہے وہاں بھی

اللہ نگہبان یہاں بھی ہے وہاں بھی

خونخوار درندوں کے فقط نام الگ ہیں

شہروں میں بیابان یہاں بھی ہے وہاں بھی

رحمٰن کی قدرت ہو کہ بھگوان کی مورت

ہر کھیل کا میدان یہاں بھی ہے وہاں بھی

ہندو بھی مزے میں ہے مسلماں بھی مزے میں

انسان پریشان یہاں بھی ہے وہاں بھی

اٹھتا ہے دل و جاں سے دھواں دونوں طرف ہی

یہ ‘میر’ کا دیوان یہاں بھی ہے وہاں بھی

٭٭٭

___________________

___________________

ابھی وقت سے ہاتھا پائی ہے زندہ

میں زندہ ہوں جب تک لڑائی ہے زندہ

کہا عید کے روز قربانیوں نے

خدا کے کرم سے قصائی ہے زندہ

مغل دور آیا بھی، آ کر گیا بھی

مگر راکھی والی کلائی ہے زندہ

ابھی سے نہ تہذیب پر تبصرہ کر

ابھی تو بہت سی خدائی ہے زندہ

کبھی شہر سے دور جا کر بھی بیٹھو

پرندوں کی نغمہ سرائی ہے زندہ

٭٭٭