آج کچھ یوں شب تنہائی کا افسانہ چلے
روشنی شمع سے دل درد سے بیگانہ چلے
شعلہ در شعلہ کسی یاد کے چہرے ابھریں
موج در موج حباب رخ جانانہ چلے
کچھ نہ ہو آنکھ میں بے درد نگاہوں کے سوا
گفتگو ساقیِ دوراں سے حریفانہ چلے
وقت جھومے کہیں بہکے کہیں تھم جائے کہیں
کھل اٹھیں نقش قدم یوں کوئی دیوانہ چلے
ٹوٹنے پائے نہ یہ سلسلۂ گردش درد
دست در دست چھلکتا ہوا پیمانہ چلے
٭٭٭
ڈوبتے تاروں سے پوچھو نہ قمر سے پوچھو
قصۂ رخصت شب شمع سحر سے پوچھو
کس نے بہلایا خزاں کو گل تر سے پوچھو
گل پہ کیا گزری بہاروں کے جگر سے پوچھو
کون رویا پس دیوار چمن آخر شب
کیوں صبا لوٹ گئی راہ گزر سے پوچھو
رات بھر دیپ سر راہ جلے کس کے لیے
کیوں اندھیرا تھا بھرے گھر میں قمر سے پوچھو
کس کے دامن سے لگی نکہت گل روتی ہے
کون ہوتا ہے جدا جی کے نگر سے پوچھو
ایک آواز تو گونجی تھی افق تا بہ افق
کارواں گم ہے کہاں گرد سفر سے پوچھو
٭٭٭