غزلیں ۔۔۔ منصور آفاق

صحبتِ قوسِ قزح کا کوئی امکاں جاناں

کوئی دلچسپی، کوئی ربط دل و جاں جاناں

 

میرے اندازِ ملاقات پہ ناراض نہ ہو

مجھ پہ گزرا ہے ابھی موسمِ ہجراں جاناں

 

جو مرے نام کو دنیا میں لیے پھرتے ہیں

تیری بخشش ہیں یہ اوراقِ پریشاں جاناں

 

آ مرے درد کے پہلو میں دھڑک کہ مجھ میں

بجھتی جاتی ہے تری یادِ فروزاں جاناں

 

تیری کھڑکی کہ کئی دن سے مقفل مجھ پر

جیسے کھلتا نہیں دروازۂ زنداں جاناں

 

تیری گلیاں ہیں ترا شہر ہے تیرا کوچہ

میں، مرے ساتھ ترا وعدہ و پیماں جاناں

 

پھر کوئی نظم لٹکتی ہے ترے کعبہ پر

پھر مرے صبر کی بے چارگی عنواں جاناں

 

ہجر کا ایک تعلق ہے اسے رہنے دے

میرے پہلو میں تری یاد ہراساں جاناں

 

ہم فرشتوں کی طرح گھر میں نہیں رہ سکتے

ہاں ضروری ہے بہت رشتۂ انساں جاناں

 

زخم آیا تھا کسی اور کی جانب سے مگر

میں نے جو غور کیا تیرا تھا احساں جاناں

 

اس تعلق میں کئی موڑ بڑے نازک ہیں

اور ہم دونوں ابھی تھوڑے سے ناداں جاناں

 

دشت میں بھی مجھے خوشبو سے معطر رکھے

دائم آباد رہے تیرا گلستاں جاناں

 

ویسا الماری میں لٹکا ہے عروسی ملبوس

بس اسی طرح پڑا ہے ترا ساماں جاناں

 

مجھ کو غالب نے کہا رات فلک سے آ کر

تم بھی تصویر کے پردے میں ہو عریاں جاناں

 

وہ جو رُوٹھی ہوئی رت کو بھی منا لیتے ہیں

بس وہی شعرِ فراز اپنا دبستاں جاناں

 

روشنی دل کی پہنچ پائی نہ گھر تک تیرے

میں نے پلکوں پہ کیا کتنا چراغاں جاناں

 

کیا کہوں ہجر کہاں وصل کہاں ہے مجھ میں

ایک جیسے ہیں یہاں شہر و بیاباں جاناں

 

چھت پہ چڑھ کے میں تمہیں دیکھ لیا کرتا تھا

تم نظر آتی تھی بچپن سے نمایاں جاناں

 

اک ذرا ٹھہر کہ منظر کو گرفتار کروں

کیمرہ لائے ابھی دیدۂ حیراں جاناں

 

مانگ کر لائے ہیں آنسو مری چشمِ نم سے

یہ جو بادل ہیں ترے شہر کے مہماں جاناں

 

لڑکیاں فین ہیں میری انہیں دشنام نہ دے

تتلیاں پھول سے کیسے ہوں گریزاں جاناں

 

آگ سے لختِ جگر اترے ہیں تازہ تازہ

خانۂ دل میں ہے پھر دعوتِ مژگاں جاناں

 

زخم در زخم لگیں دل کی نمائش گاہیں

اور ہر ہاتھ میں ہے ایک نمکداں جاناں

 

تھم نہیں سکتے بجز تیرے کرم کے، مجھ میں

کروٹیں لیتے ہوئے درد کے طوفاں جاناں

 

بلب جلتے رہیں نیلاہٹیں پھیلاتے ہوئے

میرے کمرے میں رہے تیرا شبستاں جاناں

 

رات ہوتے ہی اترتا ہے نظر پر میری

تیری کھڑکی سے کوئی مہرِ درخشاں جاناں

 

تُو کہیں بستر کمخواب پہ لیٹی ہو گی

پھر رہا ہوں میں کہیں چاک گریباں جاناں

٭٭٭

 

 

 

آج کے نام

تباہی ہے شبِ آئندگاں تباہی ہے

یہ لگ رہا ہے مجھے ناگہاں تباہی ہے

 

کوئی معاشرہ ممکن نہیں بجز انصاف

جہاں جہاں پہ ستم ہے وہاں تباہی ہے

 

میں ٹال سکتا نہیں آیتوں کی قرأت سے

لکھی ہوئی جو سرِ آسماں تباہی ہے

 

بچھے ہوئے کئی بھونچال ہیں مکانوں میں

دیارِ دل میں مسلسل رواں تباہی ہے

 

دعا کرو کہ قیامت میں دیکھتا ہوں قریب

مرے قریب کوئی بے کراں تباہی ہے

 

فراز مند ہے ابلیس کا علم منصور

گلی گلی میں عجب بے نشاں تباہی ہے

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے