نظمیں ۔۔۔ عارفہ شہزاد

____________________________________________________________________

آنکھ کہاں تک جا سکتی ہے

____________________________________________________________________

 

 

ہرے ،بنفشی،نیلے،اودے

سب رنگوں کو چھو سکتے ہیں

داغ سدا سے ہے آنکھوں پر

آنکھ کی پتلی

کھرچیں کیسے

تیز شعاعیں مثبت منفی

ہر اک جسم سے پھوٹ رہی ہیں

روشنیاں بھی بھر سکتی ہیں

کر سکتی ہیں وار کٹیلا

پرکھ رہے ہیں گنگ زبانیں

سن سکتے ہیں رات کی چپ کو

چکھ سکتے ہیں دن کا سورج

بھیتر کے سب بھید سنائیں

چھو کر سب کچھ کہتے جائیں

ہونٹ ازل سے،پیمانہ ہیں !

٭٭٭

 

____________________________________________________________________

عکس نیلے نہیں۔۔۔

____________________________________________________________________

 

 

پردہ عکس پر ایک نیلا تموج جو بہنے لگا

راز کہنے لگا

شور لہروں کا بڑھتا گیا

دل کی ہر ایک دھڑکن سماعت بنی

جسم کا رواں رواں بصارت میں ہے ڈھل گیا

عکس نیلے نہیں

عکس رنگین ہیں

جرم آنکھوں کے کب اتنے سنگین ہیں!

آنکھ کی پتلیوں میں کہیں رقص کرتے ہوئے

رنگ چھٹتے نہیں!

ایک عادت نہیں…

کوئی نشہ ہے آنکھوں سے لپٹا ہوا

شہد آگیں زبانیں ہیں متلاشی کن ذائقوں کی؟

گلہ خشک ہے

انگلیاں، جستجو پر ہیں آمادہ

آسودگی کا پتا کچھ نہیں

عکس نیلے نہیں

عکس بے رنگ ہیں!

جلتی آنکھوں پہ اک بار ہیں

عکس تو خار ہیں

خواہشوں کے سسکتے ہوئے جسم پر وار ہیں

پردہ عکس کو نوچیے

کوسیے اس گھڑی کو

بسر ہو گئی جو گناہ بے لذت کو

چکھتے ہوئے

اگلی شب بکتے جھکتے ہوئے ہی سہی

موج در موج پھیلا ہوا ایک طوفان

آنکھوں میں پھر سے سمانا تو ہے

پھر نئی آس پر

عکس در عکس جادو جگانا تو ہے!

٭٭٭

 

____________________________________________________________________

زمیں، اڑ تو سکتی نہیں!

____________________________________________________________________
زمیں ،باد مسموم سہتی رہی

اس کے سینے میں بہتی رہی

کوئی پگھلی ہوئی آرزو!

خالی پن سے بھری ۔۔۔جستجو

ایڑیوں کو اٹھائے ہوئے

اپنی آنکھوں پہ ہاتھوں کا چھجا جمائے ہوئے

کس کو تکتی رہی؟

دیکھ!آکاش میں

کتنے منظر اڑانیں ہیں بھرنے لگے

دن گزرنے لگے

او پرندے!

ذرا چرخ الٹا گھما

ٹوٹنے دے طنابیں دنوں کی ابھی

سیدھی گنتی کو تو بھول بھی جا کبھی

او پرندے!

ہوائیں جھجکتی نہیں

موسموں کے الٹ پھیر میں

کون الجھا ہے کس گھیر میں

کوئی جلدی نہیں جاننے کی مگر

ایسا رکھا ہے کیا

دیر میں؟

٭٭٭

 

____________________________________________________________________

ڈھونڈے کون جواب؟

____________________________________________________________________

 

دروازے کی کھونٹ سے ٹانگے

کس نے سات سوال

بے سر اور بے تال

تال سنی ہے کس نے بولو

کون ہوا بے حال

لمس انوکھا جال!

جال کی اک اک تار میں الجھا

جیون کس کے نام

ایک سوال ہے خام

خام کہاں ہیں سارے منظر

کب ہے جھلسی دھوپ

گہنایا کیوں روپ؟

روپ سروپ کی باتیں چھوڑو

دوری کا ہر میل

گاڑے دل میں کیل

کیل اکھیڑو ان ہونٹوں سے

حبس کا موسم ٹھہرا

سانس ذرا لوں گہرا

گہرا سانس اگر لوں بھی تو

اندھی گہری رات

کون سی ہے اب گھات؟

گھات سے آنکھ چراؤں کیسے

کس کا مانگوں ساتھ؟

تھام لے نا اب ہاتھ!

٭٭٭

 

 

____________________________________________________________________

ان سومنیا

____________________________________________________________________

 

 

رات کی ہتھیلی پر

جلتی بجھتی نیندوں کے

رکھ دئیے ہیں انگارے

ہیں دھواں دھواں آنکھیں

کچھ پتا نہیں چلتا

پھوٹتی ہے چنگاری

آگ بن کے پھیلی تو

کس کو جا لپیٹے گی؟

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے