خاکستری خواب کا موجد
بے مثل فکشنسٹ، قدیم دوست اسلم سراج الدین کی یاد میں
خوابِ خاکستری کا سفر
طے نہیں ہو سکا
کُنجِ دل میں کہیں
کوئی حسرت
اُٹھاتی ہے سر
عشق کے کھیل میں
قرمزی حرف جیسے
کبوتر تخیّل کی چھتری سے اُتریں
غُٹر غُوں .. غُٹر غُوں
تواریخ کے
سال ہا سال ادراک سے
اَن چھُوئی کینوس پر بناتا ہے تصویریں
’وہ‘
’ٹِلے باشے کا چھجوا‘
’یہ پینٹنگ ہے ‘
لیکن
کسی جسم کے جلنے کی بُو پہ رُو مال کیوں
آج کے مُنصفوں نے رکھا
ناک پر
یہ جو BIG BANG کے بعد کی
اوّلیں ساعتیں
صاف و شفاف پانی کے
چاندی کٹوروں میں
اس عہد کا گدلاپن
دیکھ سکتے ہیں ہم
بانٹتا ہے تہی ہاتھ لوگوں میں
اَن دیکھی جاگیریں
سُرخاب کے پر تھماتا ہے
ویران آنکھوں کو
سوچوں کی قندیل کی آنچ میں
نرم نیلاہٹیں پھیلتی ہی چلی جا رہی ہیں
اگرچہ ابھی خوابِ خاکستری کا سفر
طے نہیں ہو سکا
ماورائی منازل کی سطحوں کو
چھُوتا ہوا
ایک ذہنِ رسا
زندگی کے ORIGIN کی
جِدّت کا رَسیا
پرندہ کوئی
اپنی حیرت میں گُم
اور نہتّی مسافت کے تلوؤں کے
خارِ مُغیلاں کا حسّاس
اک داستاں گو
٭٭٭
اسلم صاحب 3 دسمبر 2013 کو وفات پا گئے تھے
٭٭٭
ادرک کا قہوہ
ہاتھ
میں
ہاتھ ہے
ایک پری کا
ادرک کے قہوے کا
خُوشبُو دار دھُواں
گھنے اشجار کے کُنج تلک لے جاتا ہے
خوابوں کی کُٹیا ہو جیسے
چرواہی کی
بھیڑوں کے پیچھے پیچھے
بھیڑیئے کی ہے تھوتھنی خون آلُود
قطرہ قطرہ
لہُو
چراگاہوں کو
چاٹ رہا ہے
سرما کی آمد پر
اُون
خریدنے آئے تھے
واپسی کا رستہ کھو بیٹھے ہیں
گرمائِش لیتے لیتے
غیر آباد سفر کی دُوری کی دلدل میں
مچھلیاں بن جاتے ہیں
برفانی ریچھوں کے زمِستاں کی
منظر کور بہانہ
کسی مہک کا حیلہ ہمیں لِئے پھرتا ہے
٭٭٭