شہ و کیفِ غزل، حُسنِ غزل، جانِ غزل
آ تجھے گیت کا اندازِ ترنّم دے دوں
تیرے سہمے ہوئے ہوں ٹوں کو تبسم کی لکیر
تیری اوندھی ہوئی آنکھوں کو حیا کی چِلْمَن
تیرے سوئے ہوئے ماتھے کو شفق کی تنویر
تیری الجھی ہوئی زلفوں کو بہارِ گلشن
تیرے دہکے ہوئے عارض کو لہکتے سے کنول
آ تجھے گیت کا اندازِ ترنّم دے دوں
نشہ و کیفِ غزل، حُسنِ غزل، جانِ غزل
آ تجھے گیت کا اندازِ ترنّم دے دوں
دھوپ کا راج، چندرما کی حکومت کا غرور
بعدِ محنت کسی مزدور کی باہوں کی تھکن
جرأتِ ضبط، غمِ عشق، وفاؤں کا شعور
شوکتِ حسنِ فسوں کار کے ماتھے کی شکن
اشک جب ساز اُٹھا لے تو کسی راگ میں ڈھل
آ تجھے گیت کا اندازِ ترنّم دے دوں
نشہ و کیفِ غزل، حُسنِ غزل، جانِ غزل
آ تجھے گیت کا اندازِ ترنّم دے دوں
سبز چادر میں وہ لپٹا ہوا محنت کا جمال
بالیاں کھیت کی تھالی میں لئے لالِ یمن
آم کی بور، بھرے مدھ کے کٹوروں میں گلال
اَدھ کھلے پھولوں کو نہلاتا ہوا مُشکِ خُتن
چل اُدھر گاؤں میں احساس جہاں جائے مچل
آ تجھے گیت کا اندازِ ترنّم دے دوں
نشہ و کیفِ غزل، حُسنِ غزل، جانِ غزل
آ تجھے گیت کا اندازِ ترنّم دے دوں
حُسْن محشر کا لٹاتا ہوا اندازِ خرام
تیرے چرنوں کو دھلاتے ہوئے مدمست پون
رقص کرتی ہوئی آنچل کو ترے دوج کی شام
تیری انگڑائی کو بل کھاتا ہوا نیل گگن
تیری پرچھائیں سے تعمیر کروں تاج محل
آ تجھے گیت کا اندازِ ترنّم دے دوں
نشہ و کیفِ غزل، حُسنِ غزل، جانِ غزل
آ تجھے گیت کا اندازِ ترنّم دے دوں
٭٭٭