اندھیری ہے دُنیا
________________________________________
اندھیری ہے دُنیا
کوئی روشنی، کوئی اُمّید، اندر نہ باہر
دِلوں میں جو کِرنیں تھیں، روشن فسوں تھے
ازَل سے مُقدّر کے محکوم، تنہا
تہی دست انساں کا
جو زادِ رہ تھے، متاعِ جنوں تھے
اچانک سیہ پڑ گئے ہیں
اور انساں
لُٹا، مار کھایا ہوا
وقت کی شاہرہ پر
پھر اک بار پاگل ہوا پِھر رہا ہے
باہر جہاں سخت ویراں ہے، قاتل ہے، بیگانہ تر ہے
کوئی ابر، کوئی ہوا، کوئی رہ چارہ گر ہے
نہ ہی دُور تک
جل بُجھے دل کی پھر سے چمک اُٹھنے کی کچھ خبر ہے
٭٭٭
التماس
________________________________________
اے کسی خاک کے کوئ ذرّو
تہِ آب کے کوئ قطرو
کسی آگ کے کوئی شعلو
مِری روح
جب مَوت کے وار سہہ کر
مِرا جسم چھوڑے
گُلوں میں سجائی
کہ خوں میں نہائی
مِری لاش کو
میرے احباب
یا میرے دُشمن
مُحبّت سے
یا ٹھوکروں سے
تمہارے حوالے کریں
تو تم اس جان ہارے
صد آفت سہارے
مِرے جِسم کو
امن و نرمی سے
اپنی پناہوں میں رکھنا!
٭٭٭
شُکریہ-