اسد محمد خان کی چند مختصر نظمیں

(بشکریہ کامران نفیس)

گاربیج کلکٹر

____________________________

رات کو سونے سے پہلے

اپنے سارے گیت لکھ لو

اپنی ساری نظموں کا املا ٹھیک کر لو

صبح کو شاید کفن لے کر

مورخ آئے گا

رام بابو سکسینہ آئے گا

٭٭

دس از اَ رکارڈِنگ

____________________________

گنا پیلتے ہوئے

اور رہٹ چلاتے ہوئے

اور گھاس کھودتے ہوئے

ماہیا کیوں گاتے ہو؟

تم کونسی فری کوئنسی پر زندہ ہو؟

اور کیا تم ابھی تک مرے نہیں

مرے نہیں __مرے نہیں __مرے نہیں

مرے نہیں۔۔۔

رے نہیں۔۔۔

نہیں۔۔۔ ن۔۔

٭٭

سنگل ___ ڈبل مرڈر

____________________________

سو اس تیسرے نے

کہ جو دوسرے کی طرح

صرف نفرت کی بو سونگھ سکتا تھا

اپنے ہی پہلو میں ایک میخ ٹھونکی

اور اپنے ہی حلقوم میں انگلیاں گاڑ دیں

اور اپنے ہی مڑتے ہوئے سبز ہونٹوں سے

اتنا کہا:

’’دوسرے! او کمینے!!‘‘

٭٭

گلی میں آواز دو

____________________________

گلی میں آواز دو

’’کوئی ہے؟

’ؔ’یہاں کوئی ہے؟؟

’’ارے کوئی ہے؟؟؟

تو اپنا نیکر سنبھالتا

چھ برس کا بچہ

(حرامزادہ!)

گلی کے ہر مکاں سے نکلے گا۔۔۔

مکاں سے نکلے گا اور کہے گا:

’’یہاں سبھی ہیں۔۔۔۔

سبھی ہیں بس ایک میں نہیں ہوں!‘‘

٭٭

اتم تار نئی طربیں

____________________________

تو اب ٹین بجاؤ

اور منہ پر کلائی رکھ کر بکرا بلاؤ

کہ ہم نے ستار کے کدو میں

بجلی کے برمے سے

سات سوراخ کر دیے ہیں:

سا رے گا ما پا دھا نی

٭٭

نے ٹِو ہوسپی ٹیلٹی

(Native Hospitality)

____________________________

سرکار _ کوئی جان گلکرسٹ صاحب آئے ہیں۔

بٹھاؤ _ پوچھو کیا شوق فرمائیے گا؟

حضور _ کہتے ہیں پولو کھیلوں گا

تو اپنے میر امن کو بھیج دو

٭٭

سچے لفظ

____________________________

سچے لفظ کہاں چھوڑ آئے

کیا کرتے میں جیب نہیں تھی

٭٭

 کل کہیں ایسا نہ ہو

____________________________

میرے لفظ اگر تمھیں سنائی نہیں دیتے

تو مجھ پر ہنستے کیوں ہو

اور مجھے پتھر کیوں مارتے ہو؟

کل کہیں ایسا نہ ہو

کہ سماعتیں بحال ہو جائیں

اور یہ زخم تمھیں تکلیف پہنچائیں

٭٭٭