آئیے آسماں کی اور چلیں
ساتھ لے کر زمیں کا شور چلیں
چاند الفت کا استعارہ ہے
جس کی جانب سبھی چکور چلیں
یوں دبے پاؤں آئی تیری یاد
جیسے چپکے سے شب میں چور چلیں
دل کی دنیا عجیب دنیا ہے
عقل کے اس پہ کچھ نہ زور چلیں
سبز رت چھائی یوں ان آنکھوں کی
جس طرح ناچ ناچ مور چلیں
تم بھی یوں مجھ کو آ کے لے جاؤ
جیسے لے کر پتنگیں ڈور چلیں
٭٭٭
اس کے گلابی ہونٹ تو رس میں بسے لگے
لیکن بدن کے ذائقے بے کیف سے لگے
ٹوٹے قدم قدم پہ جو اپنی لچک کے ساتھ
وہ دلدلوں میں ذات کی مجھ کو پھنسے لگے
تمثیل بن گئے ہیں سمندر کی جھاگ کی
صحرائے غم کی راکھ میں جو بھی دھنسے لگے
جن کا یقین راہ سکوں کی اساس ہے
وہ بھی گمان دشت میں مجھ کو پھنسے لگے
ہم لے کے بے امانی کو جنگل میں آ گئے
دل کو جو شہر خوباں میں کچھ وسوسے لگے
٭٭٭
سمٹتی شام اگر درد کو جگائے گی
تو صبح نوحۂ معتوب گنگنائے گی
میں ہنس پڑوں گا تو پھر کسمسا اٹھے گی فضا
ہوائے تند مری لو جو گدگدائے گی
نمو میں موج بنے گی تمازت فردا
ردائے تیرگی جتنے قدم بڑھائے گی
زمین گائے گی آم اور جامنوں کے گیت
برستی بدلی وہ سر تال آزمائے گی
جہاں پہ چاند زمیں سے لپٹ کے مہکے گا
نشے میں چاندنی گیت اپنے گنگنائے گی
زمیں ستارے فلک ایک ہوں گے گردش میں
رتیں وہ ایسی اگر اپنے ساتھ لائے گی
ہزار بعد و تفاوت کے باوجود حنیفؔ
وہاں بھی مجھ سے ملے گی جہاں وہ جائے گی
٭٭٭
سانپ کا سایہ خواب مرے ڈس جاتا ہے ۔۔۔ حنیف ترین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سانپ کا سایہ خواب مرے ڈس جاتا ہے
کتنی دفعہ تو
بڑھا، رکا میں اس کی جانب
صدیوں وہ مہکا کر میرا ظاہر و باطن
کئی یگوں تک، اس نے مجھ کو یاد کیا
اور کہا یہ، ندی ہوں میں
ناؤ بنو تم ڈولو مجھ پر
جھوم اٹھو تن کی چاندی سونا پا کر
لیکن میرے جسم کے ویرانے سے کوئی
ہر دم مجھ کو تاک رہا ہے
تن سے آگے
من نگری میں جھانک رہا ہے
نیند نشے کے
گیان دھیان میں سان رہا ہے
سر سے قدم تک تان رہا ہے
٭٭٭
دھرتی کا اپہار ۔۔۔ حنیف ترین
۔۔۔۔۔۔۔۔۔۔۔۔۔۔۔۔۔۔۔
دھرتی کا اپہار ملا جب
خود میں اتر کر میں رویا تھا
باہر منظر
پھوٹ پھوٹ کر اتنا رویا
ہر شے ڈوب گئی تھی
اور میں اس پل
اپنے تن کی کشتی کھیتا
سات سمندر پار گیا تھا
سورج تاروں اور امبر نے
گلے لگا کر
دھرتی کا اپہار دیا تھا
سب کچھ مجھ پر وار دیا تھا
٭٭٭
دو دھاری تلوار ۔۔۔ حنیف ترین
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خواہش کی تسکیں کی خاطر
اپنے لا یعنی جذبوں کو
لوح دل پر آنک رہے ہیں
دیش بدیش کی خاک چھان کے
گرتے پڑتے پھانک رہے ہیں
اپنی دید سے غافل رہ کر
نا دیدہ کو جھانک رہے ہیں
٭٭٭