غزلیں۔ ۔ ۔ اعجاز گل

 

عیاں    ہوا     نہ     کبھی   جو       نہاں   کے    پیچھے  ہے

کہ     اصل     واقعہ         ہر       داستاں   کے    پیچھے  ہے

 

طویل   مشق   خسارے    کی     اس     میں    ہے    درکار

اگرچہ         سود           میسّر           زیاں    کے    پیچھے  ہے

 

فرار       ہو       نہیں      پاتا       ہوں       رائگانی         سے

کوئی     لگا       ہوا       مجھ         رائگاں   کے    پیچھے  ہے

خَلا       ملا       ہے          ابھی     دوربین       کو           آگے

پتا       چلا       نہیں      کیا آسماں   کے    پیچھے  ہے

 

کہاں      ٹھہرتا     ہے      جا     کے    یہ     عمر     کا     دریا

سفینہ       اپنا         بھی       آبِ       رواں     کے    پیچھے  ہے

 

ڈراتا رہتا       ہے      آسیب         ناگہانی           کا

چھپا   ہوا           جو       کسی   ناگہاں    کے  پیچھے  ہے

 

عجب       ہے      حال         یہاں    خواہشِ     مکانی     کا

ہجوم دوڑ       رہا             لا مکاں   کے    پیچھے  ہے

 

کبھی       بہار       گزرتی         تھی         درمیان         کہیں

قیام     اب     تو       خزاں     کا     خزاں   کے  پیچھے  ہے

٭٭٭

 

 

 

خیال ہے کہ تماشا ہے آسمان سی شے

مگر یقین کا باعث ہے یہ گمان سی شے

 

یہ لگ رہا ہے کہ پہلے بھی سن چکا ہوں کہیں

سنا رہے ہیں جو دن رات داستان سی شے

 

ہو ملتفت تو درونِ سکوت ، حیرت کا

عجیب شہر دکھاتی ہے خاک دان سی شے

 

ہوا عذاب مرے دن کو آفتاب کا بوجھ

طلسمِ شام! ہٹا سر سے یہ چٹان سی شے

 

بہت نحیف تھے اِس عمر کے در و دیوار

کہ اپنے زور سے گرتی رہی مکان سی شے

 

ہر ایک فعل مرا نیکیوں سے ہے مشروط

رکھے اسیر مجھے دوسرے جہان سی شے

 

سفر کے بعد بھی ہوتی نہ تھی تھکان کبھی

سفر سے پہلے بدن میں ہے اب تھکان سی شے

 

وہ کوئلہ ہے کہ پتھر کہ راکھ ، بے معنی

اگر پسند تجھے ہے یہ کہکشان سی شے

٭٭٭

 

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے