________________________________________________
محاصرہ
________________________________________________
میں کھو گئی ہوں
کتابوں میں رکھے پھولوں کی مانند
جنہیں تم بھو ل چکے ہو
جانے کب
تم بے خیالی میں صفحے پلٹو
اور سوکھی پتیاں
تمہارے قدموں میں
ریزہ ریزہ ہو جائیں
٭٭٭
________________________________________________
خوش گمان
_______________________________________________
جہاں روحوں کے ملنے پر
پابندی ہو
مگر
جسم مل رہے ہوں
وہاں تم یہ امید لگائے بیٹھے ہو
کہ
کوئی عورت
کسی مسیحا کو
جنم دے گی
٭٭٭
________________________________________________
جس تن لاگے
________________________________________________
گاڑی میں بجتے ہوئے بے ہنگم میوزک کو
دھیما کرنے کی ضرورت محسوس کی
نہ کبھی اندر آتے جاتے
لوگوں کے اداس چہروں پر غور کیا
میں نے کبھی
وہاں
خامشی اختیار نہیں کی!
اب وہاں سے گزرتے ہوئے
میری زبان گنگ ہو جاتی ہے
گاڑی میں بجتا دھیما میوزک بھی
میرے کانوں کے پردے پھاڑنے لگا ہے
اور اندر آتے جاتے چہروں میں
مجھے اپنا چہرہ نظر آتا ہے!
کیونکہ
اب میرے پیارے بھی
قبرستان میں جا بسے ہیں !…
٭٭٭
________________________________________________
المیہ
________________________________________________
اس کی لاش
بے گور و کفن پڑی ہے
مگر سب چپ ہیں
وہ بچے بھی
جو اس پگلی
کو تنگ کر کے خوش ہوتے تھے
وہ عورتیں بھی
جو ایک روٹی کے بدلے
کئی کام نکلوا لیتی تھیں
اور وہ مرد بھی
جو اس کے ساتھ
دن بھی رات کی طرح
بسر کر نے میں
کوئی حرج نہیں سمجھتے تھے
سبھی چپ ہیں
کیونکہ ان میں سے کوئی نہیں جانتا
کہ اس پگلی کا
مسلک کیا تھا
٭٭٭
________________________________________________
فرق
________________________________________________
اپنی ہڈیوں کا گودا جلا کے جمع پونجی
اس کے آرام و آسائش پہ نچھاور کرنے والی
جاڑوں کی ظالم طویل راتیں جاگ کر
ٹھٹھرتے ہاتھوں سے
اپنے بچے کی غلاظتیں دھونے والی
لاچار اور بیمار بوڑھی ماں سے
اس کا لخت جگر
پوچھتا ہے
جانتی ہو
تمہارے ایک نیپی کی قیمت کیا ہے؟
٭٭٭