نظمیں ۔۔۔ عبد الاحد ساز

بمبئی کی ایک پرانی شام

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شام ڈھلے

چرچ گیٹ کے اس طرف

بیکھا بہرام کا کنواں

کراس میدان کے فٹ پاتھ پر بنے

برسوں پرانے بینچوں پر بیٹھے ہوئے

برسوں پرانے پارسی

سفید لانبا کوٹ

سیاہ قدیم کلاہ

خاموش اور گمبھیر

کھوئی کھوئی نظریں جمائے

جیسے پرانے بمبئی کی روح

آ نکلی ہو

آج کی شام کا کوئی منظر دیکھنے

٭٭٭

فساد کے بعد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

فساد شہر تھم گیا

فضا میں بس گئی ہے ایک زہر ناک خامشی

ہراس خوف بے بسی

میں کھا رہا ہوں پی رہا ہوں جی رہا ہوں کس طرح

یہ نرم لقمۂ غذا

گرم گھونٹ چائے کا

کسی خیال کے تلے

جلے ہوئے لہو کے ذائقے سا منہ میں جم گیا

فشار کشت و خوں کے بعد

مضطرب سکوت

جیسے دھڑکنوں کے راستے میں تھم گیا

شعور عمر و زندگی سمٹ گیا ہے کرب کے جمود میں

شگاف پڑ گیا ہے جیسے دور تک وجود میں

وہ کیفیت ہے

جیسے گھر میں کوئی مر گیا ہو اور

اس کی لاش دیر تک زمین پر دھری رہے

کوئی جگہ سے ہل کے

اس کو دفن تک نہ کر سکے

٭٭٭

غزلیں ۔۔۔ عبد الاحد ساز

بہت ملول بڑے شادماں گئے ہوئے ہیں

ہم آج ہم رہ گم گشتگاں گئے ہوئے ہیں

اگرچہ آئے ہوؤں ہی کے ساتھ ہیں ہم بھی

مگر گئے ہوؤں کے درمیاں گئے ہوئے ہیں

نظر تو آتے ہیں کمروں میں چلتے پھرتے مگر

یہ گھر کے لوگ نہ جانے کہاں گئے ہوئے ہیں

سحر کو ہم سے ملو گو کہ شب میں بھی ہیں یہیں

یہ کوئی ٹھیک نہیں کب کہاں گئے ہوئے ہیں

کہیں سے لوٹ کے قصے سنائیں گے تم کو

کہیں سنانے کو ہم داستاں گئے ہوئے ہیں

تلاشیے پھر انہیں میں تراشیے پھر انہیں

یہی وسیلے کہ جو رائے گاں گئے ہوتے ہیں

ابھی تعین سطح کلام کیا پوچھو

ابھی تو ہم تہہ عجز بیاں گئے ہوئے ہیں

بجا کہ راز کی باتیں بتائیں گے تمہیں سازؔ

مگر سنبھل ہی کے سننا میاں گئے ہوئے ہیں

٭٭٭

دور سے شہر فکر سہانا لگتا ہے

داخل ہوتے ہی ہرجانہ لگتا ہے

سانس کی ہر آمد لوٹانی پڑتی ہے

جینا بھی محصول چکانا لگتا ہے

روز پلٹ آتا ہے لہو میں ڈوبا تیر

روز فلک پر ایک نشانہ لگتا ہے

بیچ نگر دن چڑھتے وحشت بڑھتی ہے

شام تلک ہر سو ویرانہ لگتا ہے

عمر زمانہ شہر سمندر گھر آکاش

ذہن کو ایک جھٹکا روزانہ لگتا ہے

بے حاصل چلتے رہنا بھی سہل نہیں

قدم قدم پر ایک بہانہ لگتا ہے

کیا اسلوب چنیں کس ڈھب اظہار کریں

ٹیس نئی ہے درد پرانا لگتا ہے

ہونٹ کے خم سے دل کے پیچ ملانا سازؔ

کہتے کہتے بات زمانہ لگتا ہے

٭٭٭

مزاج سہل طلب اپنا رخصتیں مانگے

ثبات فن مگر اے دل عزیمتیں مانگے

افق پہ حسن ادا کے طلوع مہر خیال

فضائے شعر سحر کی لطافتیں مانگے

مصر ہے عقل کہ منطق میں آئے عقدۂ جاں

قدم قدم پہ مگر دل بشارتیں مانگے

نئی اڑان کو کم ہیں یہ ذوق کے شہپر

نئی ہواؤں کا ہر خم ذہانتیں مانگے

شعور کے قد و قامت پہ ہے نظر کس کی

یہ فربہ چشم زمانہ جسامتیں مانگے

نفیس و سہل نہیں وضع شعر کی تدریج

ہر ایک سوچ دگرگوں سی حالتیں مانگے

سکون طول وفا ہے طلب کی کوتاہی

کہ لمس یاد دھڑکتی جسارتیں مانگے

شعاع مہر سے دھل جائیں جیسے ماہ و نجم

ترا خیال انوکھی طہارتیں مانگے

نہ پوچھ سازؔ کو وہ تو سراب والوں سے

پھرے ہے کاسۂ دل میں حقیقتیں مانگے

٭٭٭

حصار دید میں جاگا طلسم بینائی

ذرا جو لو تری شمع بدن کی تھرائی

نہ جانے کس سے بچھڑنے کے راگ رنگ ہیں سب

یہ زندگی ہے کہ فرقت کی بزم آرائی

سکوت بحر میں کس غم کا راز پنہاں تھا

بس ایک موج اٹھی اور آنکھ بھر آئی

یہ سمت سمت تخاطب افق افق تقریر

ترا کلام ہے میرا رفیق تنہائی

خرد کی رہ جو چلا میں تو دل نے مجھ سے کہا

عزیز من ”بہ سلامت روی و باز آئی”

اٹھائے صور سرافیل دیکھتا ہی رہا

بشر کے ہاتھ نظام قیامت آرائی

کیا تھا جی کا زیاں ہم نے اک غزل بھر کو

ہزار شعر کہے ہو سکی نہ بھرپائی

٭٭٭

خراب درد ہوئے غم پرستیوں میں رہے

خوشی کی کھوج بہانہ تھی مستیوں میں رہے

ہوا حصول زر فن بڑی کشاکش سے

ہم ایک عمر عجب تنگ دستیوں میں رہے

ہر اک سے جھک کے ملے یوں کہ سرفراز ہوئے

چٹان جیسے خمیدہ سی پستیوں میں رہے

چبھن کی ناؤ میں پر کی خلیج رشتوں کی

عجب مذاق سے ہم گھر گرہستیوں میں رہے

کتابیں چہرے مناظر تمام بادہ کدے

بتائیں کیا کہ بڑی مئے پرستیوں میں رہے

مسافتیں تھیں شب فکر کن زمانوں کی

کہاں کہاں گئے ہم کیسی ہستیوں میں رہے

خلوص فکر کی گلیوں میں گھومتے تنہا

ہم اپنے شعر کی آباد بستیوں میں رہے

٭٭٭