……………………………………………
یاد کے چور دریچے سے
……………………………………………
درد بھری تنہائی میں
سوز بھری شہنائی کی
سہمی سہمی سی آواز
چپکے چپکے رونے کی
چار دنوں کی جاگن سے
بوجھل بوجھل پلکوں پر
سرخ عنابی سوجن سی
خوف سے پیلے گالوں پر
اشکوں کی کچھ تحریریں
آنکھ اٹھا کر دیکھوں تو
بائیں طرف اس سینے میں
درد سا اک دم اٹھتا ہے
سانس الجھ کر دھڑکن سے
ٹوٹ کے رونے لگتی ہے
میں پھر آنکھیں بند کر کے
یاد کے چور دریچے سے
تجھ کو سوچنے لگتی ہوں
……………………………………………
پھول چننے کے بعد ایک نظم
……………………………………………
یاد کے سبزہ زاروں میں
زرد ہری ڈھلوانوں سے
جھیل کناروں پر پھیلے
صاف کھلے میدانوں سے
رنگ برنگے خود رو پھول
آنکھ سے گرتے جھرنوں کے
شور مچاتے پانی سے
دھو کر اپنے دامن میں
خوشبو بھرکر لائی ہوں
چھوڑ کر اپنی دنیا کو
صرف تمہاری خاطر میں
خواب سے باہر آئی ہوں
٭٭٭
ہما سعید ناز! ایک نظم تو پہلے پڑھی تھی۔ دونوں ایک سے بڑھ کے ایک ہیں۔ واہ واہ!