سُنا ہے ساقی ! ترا لطف عام ہے شاید
بغیر وقفے کے، گردش میں جام ہے شاید
سمجھ میں آتی نہیں کچھ زباں ترنم کی
یہ آبشار بھی محو کلام ہے شاید
تجھے بھُلانے کی ہم نے عبث ہے کوشش کی
کتابِ دل پہ لکھا تیرا نام ہے شاید
چھُپا ہے چاند جو بادل میں، یہ اشارہ ہے
حسیں وہ آ گیا بالائے بام ہے شاید
سمجھ رہے ہیں زعیمانِ خود غرض پیہم
کہ اُن کے ہاتھ میں بختِ عوام ہے شاید
فضائے دہر پہ ہے اِک جمود کا عالم
عقابِ وقت ہُوا زیرِ دام ہے شاید
زوال آنے سے پہلے عروج لازم ہے
’ یہ کائنات ابھی ناتمام ہے شاید‘
فنا جو عشق میں ہو، اُس کو کامراں دیکھا
وفا کی راہ میں جینا حرام ہے شاید
زباں پہ پھول کی ہے انبساط کا نغمہ
چمن میں شوخ وہ محو خرام ہے شاید
٭٭٭
نہیں غم خوار بر روئے زمیں ہے
اسی باعث تو اپنا دل حزیں ہے
دکھاوے کی ہیں باتیں دوستوں کی
کسی کو کوئی ہمدردی نہیں ہے
یہاں ہے حُسن کا دعویٰ سبھی کو
حسیں وہ ہے کہ جس کا دل حسیں ہے
نظر ماحول پر رکھنا ہے لازم
نہ جانے کون مارِ آستیں ہے !
نہیں ہے شمعِ محفل کی ضرورت
مِرا گل رو بڑا روشن جبیں ہے
منور ہو گیا کاشانہ دل کا
تصور میں مِرے وہ نازنیں ہے
کچھ ایسے بھی ہیں بدقسمت جہاں میں
مقدر میں نہ دنیا ہے، نہ دیں ہے
عجب ہے اپنی جمہوری سیاست
جو وارث ہے، وہی مسند نشیں ہے
مقابل بادِ صرصر کے ہے کب سے
تری ہمت پہ اے پھولؔ!آفریں ہے
٭٭٭