منظر گزشتہ سال کے لے کر چلا گیا
آیا ہے سالِ نو تو دسمبر چلا گیا
گزری شبِ وصال لبوں کی مٹھاس میں
قربت کا کیف دے کے وہ دلبر چلا گیا
کہتا ہے آسماں ، یہ اماوس کی رات ہے
تاریکیاں ہیں ، ماہِ منور چلا گیا
ہجرت کا کرب سہہ کے نئے دیس آ گئے
منزل کے پاس پہنچے تو رہبر چلا گیا
پامال کر کے لاشیں شہیدوں کی، رات میں
صحرائے کربلا سے وہ لشکر چلا گیا
یادیں گئے برس کی دلوں کے نگر میں ہیں
لمحہ یہاں جو گزرا افق پر چلا گیا
دیکھی جھلک تھی پھولؔ نے اُس رشکِ ماہ کی
جلوہ دکھا کے وہ دلِ مضطر ! چلا گیا
٭٭٭