تتلیوں کا سال ۔۔۔ سعید خان

(2021 کی آخری نظم)

 

تتلیوں کے برس اتنی جلدی نہ جا ۔۔۔

بر سبیلِ ہوس ، جب مری وادیوں کے تناور گرائے گئے

آنکھ نے چار عشروں تلک

نا مکمل بہاروں کی کترن چُنی

عرش نے آخرش

دستِ زیبا پہ رخصت کی مہندی رکھی

زرد چادر پہ چاروں طرف سبز چاندی اترنے لگی

سرمئی لمس کی برکتوں سے سہاگن پہ خوشبو کھُلی

تب کہیں جا کے لوٹی بہارِ چمن!

 

تتلیوں کے برس اتنی جلدی نہ جا ۔۔۔

پھول تھکتے نہیں

جا چکی ہے بہار اور عروسِ چمن

بسترِ خواب و خوشبو سے اٹھنے پہ راضی نہیں

کاسنی رنگ اترا نہ تھا کہ ادھر

سرخ پھولوں سے لپٹی ہوئی چھتریاں کھل گئیں

جس طرف دیکھئے

خوابِ پروانگی کا حسیں سلسلہ نقش ہے

وہ جو اک عمر سے تتلیاں ڈھوندتی آ رہی تھی

اُسے

تتلیاں چھیڑتی ہیں ابھی صحن میں۔۔۔

تتلیوں کے برس …

تتلیوں کے برس اتنی جلدی نہ جا!

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے