ہاتھی کھلونے کی تشکیک
___________________________
سفید ہاتھی
ڈرے مہابت کو
گھُورتا ہے
کھلونا ہاتھی رکھا تھا کمرے کی کارنس پر
ذرا سرکتا، اُٹھاتا پاؤں
پھلانگتا ہانپتا گیا ہے
گلی کی جانب
گھروں میں بچوں کے کھیلنے کے کھلونے دیکھے
تو سارے ہاتھی چنگھاڑتے، روندتے
سڑک روک کر کھڑے ہیں
دبیز دلدل میں
شہر کا منجنیق ڈُوبا ہوا پڑا ہے
فریفتہ ہے
قفس
ابابیلوں کے سجل مرمریں بدن کا
پڑا ہے ماحول ذہن کے بَل شدید زخمی
یہ فیل پا جنگلی ہوا بے لباس کرتی
ہے روح در روح لہر ڈر کی
پہاڑیوں سے ہرے پرندے
ابھی اُڑے ہیں
جلے صنوبر کی راکھ لے کر
ملا کے اُن نو نہال اشکوں کی صاف شبنم
دلوں کا مرہم
ستارا معصوم انکھڑیوں کو دلاسہ دینے
پہنچ رہے ہیں
بنیرے بھرتے اُترتے
ڈھارس کے سبز تعویذ باندھنے کو
قدیم ورثے کے باغ سے غم زدہ کبوتر
٭٭٭
مایوسی کی ایک اور نظم۔۔۔۔۔۔ ۳
____________________________
یاس چبُوترا اور کرو اونچا
چھُوئے کنارا
عرش کا
مایوسی پھیلانا جتنی
میر تقی میر اور
ہمارے ناصر کاظمی کی جلتی پوروں
آنکھوں کے ڈوروں میں ہے
مقبوضہ رہنے دیں
شاعروں اور ادیبوں کی اکادمیاں
ایوانوں سے امدادی پیسوں میں اضافہ مت مانگیں
ڈھلوانوں کی پھسلن پر چلتے فنکار
لِکھ کر اپنی جبینوں پر انکار، سرِ محفل آتے ہیں
خوف ضروری ہے بِلی کو شیر بنا دیتا ہے
دھاڑ پنپنے دینا
خون کے دھبوں پر چلتے
پُر اسرار نشان رسائی دیں گے
ظلم کے اَن دیکھے اَن کہے فسانوں تک
نا اُمیدی کی سرسوں میں
سانپ کا گھر ہے
پھیلاؤ میں ڈر ہی ڈر ہے
وہاں پر ایک درخت بنا ڈالا ہے چڑیوں کی چہکار نے
جس کے گھونسلے میں
اک جلتا پر ہے
راکھ اُڑے گی ساتھ ہوا کے گلی گلی
شاید یہ اک اور سیاہ سفر ہے
یا پھر نئی مسافت کا کوئی نامہ بر ہے
٭٭٭