پگڈنڈی کا سفر
۔۔۔۔۔۔۔۔۔۔۔۔۔۔۔۔۔۔۔۔۔۔
کہیں بل کھاتی اور
کہیں سیدھی
یہ پگڈنڈی کہیں دور
سفر کو جاتی ہے
دو راہی ساتھ ہو لیتے ہیں
پھر راستے بنتے جاتے ہیں
قوس و قزح میں مدغم
سارے رنگ الگ الگ پھیلتے ہیں
آنکھوں میں امید کی
جوت جگا کر
پھر سمٹ جاتے ہیں
ہمسفر منزل کو پانے کی
دھن میں
بادل کی سیڑھی پر چڑھ کر
چار سو بکھرتی دھنک کے پار
جھانکتے ہیں
پر
اس پگڈنڈی کا انت
نہیں ملتا
جانے کہاں کو جاتی ہے
٭٭
سانپ اور سیڑھی کا کھیل
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سانپ اور سیڑھی کے
اس کھیل میں
کبھی ایسا بھی ہوتا ہے
سیڑھی پر چڑھ کے اوپر آنے والے کو
سیڑھی ہی کھا جاتی ہے
اور
سانپ دیکھتا رہ جاتا ہے
اور کبھی کبھی یوں بھی ہوتا ہے
اوپر چڑھنے والا
سانپ اور سیڑھی
دونوں کو کھا جاتا ہے
بساط کو تہ کر
جیب میں رکھ لیتا ہے
پھر
نئی ایک بساط بچھاتا ہے
دیکھیں اب
کون کس کا شکاری ہو
سانپ کو مات ہو
یا سیڑھی نے مر جانا ہے
٭٭
کنکریٹ کے جنگل
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کنکریٹ کے جنگل میں
روئیدگی کا نام نہیں
درخت سارے کٹ گئے
پرندے اداسہیں
بجلی کے تاروں پہ گھونسلے بناتے ہیں
اور بچے چاک سے
کٹے درختوں کے
ادھورے سائے کی
مکمل تصویریں بناتے ہیں
اس آس پر
یہ جنگل پھر سے ہرے ہو جائیں گے
٭٭
کثرت
۔۔۔۔۔۔۔۔۔۔۔۔۔۔۔۔
اب سمجھ میں آتا ہے
کیوں کہا گیا
کثرت سے پناہ ما نگو
بازار میں اشیا کی کثرت
انٹرنیٹ پر معلومات کی کثرت
سوشل میڈیا پر
دوستوں اور دشمنوں کی کثرت
فلٹرڈ حسن کی کثرت
داد و تحسین کی کثرت
نفرت اور تشدد کی کثرت
کوئی درمیانی راہ ایسی نہیں
جس پہ چل کر سکون دل ملے
٭٭
روزن زنداں
۔۔۔۔۔۔۔۔۔۔۔۔۔۔۔۔
روزن زنداں سے
روشن افق کے
ننھے سے ٹکڑے نے جھانکا
اور امید کی کرن
دل میں جگمگائی
٭٭٭