مختصر نظمیں ۔۔۔ سلیم انصاری

زیاں

یہ کیسا زیاں ہے

کہ اب

فصلِ گل میں پرندے

خود اپنے پروں کو کتر کے ہی

اپنے نشیمن بنانے پہ مجبور ہیں۔۔۔۔!

٭٭

جگنوؤں کے قتل میں ناکام ہو کر

جب وہ

اپنے ہاتھ میں خنجر لئے لوٹا

تو اس کے گھر کے سارے پھول

زخمی ہو چکے تھے

٭٭

مجھے تو اب بھی یقین ہے

کہ تو اب بھی

میری شہ رگ سے بھی نزدیک ہے

مگر یہ بھی سچ ہے

کہ دشمنوں نے آج

سب سے پہلے

میری شہ رگ ہی کاٹی ہے ۔۔۔۔

٭٭

پہلی عورت کے حکم کی اطاعت میں

پانچ فرمانبردار بیٹے

دوسری عورت کو

آپس میں بانٹ کر

کھا گئے

٭٭٭

One thought on “مختصر نظمیں ۔۔۔ سلیم انصاری”