غزلیں ۔۔۔ ملک حبیب

اُداس لَمحوں کو آخر تَمام کر دُوں گا

تِرے خَیال کی دُنیا میں شام کر دُوں گا

 

بس ایک جان ہی باقی تھی آج اُس کو بھی

میں درد بیچنے والوں کے نام کر دُوں گا

 

جِسے یہ زُعم کہ رکھتا ہے آنکھ میں مستی

نَظر سے اُس کو گِرا کر غُلام کر دُوں گا

 

تِری یہ سوچ نہ بَدلی تو یاد رکھ واعظ

حَرم میں رِند کو لا کر اِمام کر دُوں گا

 

اَزل کے روز سے اب تک جو راز ہے مولا

میں کھولنے پہ جو آیا تو عام کر دُوں گا

 

حبیب مجھ کو سَتا کر نہ چَین پاؤ گے

قَسم خُدا کی میں جِینا حَرام کَر دُوں گا

٭٭٭

 

دِل کی لَگی کو آج بُجھانے نِکل پَڑے

ہم خواب بیچنے کے بَہانے نِکل پَڑے

 

جِن کے گھروں کو ہم نے بَچایا تھا آگ سے

وہ لوگ گَھر ہَمارا جلانے نِکل پَڑے

 

مُدت کے بعد شہر میں آیا ہے کچھ سکوں

تُم پھِر سے اس میں آگ لگانے نِکل پَڑے

 

وحدت کی بات سنتے ہی سب مُفتیانِ شہر

کافر سمجھ کے ہم کو جَلانے نِکل پَڑے

 

راتیں کَٹی تِھیں گِریہ و زاری میں جِس جَگہ

سُنتے ہیں اب وہاں سے خَزانے نِکل پَڑے

 

ہم سے ہی روشنی کو عَداوت رَہی حَبیب

ہم چل بَسے تو دِن بھی سُہانے نِکل پَڑے

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے