حمد باری تعالیٰ ۔۔۔ تنویر پھول

حمد ِ باری تعالیٰ

 

               تنویر پھولؔ

 

حمد  میں   تیری   ہے   مصروف  یہ  بندہ    تیرا

اس  کو    درکار   ہے   اللہ!    سہارا    تیرا

 

تو  کہ  ہے  اوّل  و  آخر،  تو ہی  باطن،  ظاہر

ذات  عالی  ہے  تری  ،   نام  ہے   اولیٰ  تیرا

 

حمد  کرسکتے  نہیں  ،  اپنی  زباں   ہے  کج مج

کون  کہہ  سکتا    ہے    اللہ!   قصیدہ   تیرا

 

تو  کہ  وہّاب  ہے،  داتا ہے،  مِرا  بھر  دامن

تو   غنی   اور   ولی   ،  آسرا    مولیٰ!    تیرا

 

تو   ہے  رزّاقِ جہاں   ،  پالنے   والا  تو  ہے

خوانِ  یغما   ہے  بچھا   ارض  پہ  ہر  جا    تیرا

 

تیری  تعریف  کا   حق  کیسے ادا   ہو  یا رب!

فکر  اسفل  ہے  مِری  ،   مرتبہ  اعلیٰ    تیرا

 

تیرے محبوب  ﷺ نے یہ ہم کو  بشارت دی ہے

حشر میں   دیکھیں گے  ہم  جلوۂ  زیبا   تیرا

 

رحم ِ  مادر  میں  بناتا  ہے  تو  سب  کی  صورت ۱؎

ننھی  کونپل  جو  تناور  ہے   ،  کرشمہ   تیرا

 

ملتزم  پر   اسے  خوشبوئے  شہ دیں ﷺ ہے  ملی

تیری  چوکھٹ  پہ  کھڑا  پھولؔ  ہے  ،  منگتا    تیرا

۔۔۔۔۔

۱؎سورہ آل عمران  ،  آیت نمبر ۶

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے