پا بہ گُل

حمایت علی شاعر

صدیوں کا فاصلہ ہے جنگل سے میرے گھر تک

شاخِ ثمر بکف سے تخلیق کے ہنر تک

اُس پا پیادگی سے ، اِس برق پا سفر تک

یہ فاصلہ ہے میرے ذہن رسا کا ضامن

منزل سے تا بہ منزل ہر نقش پا کا ضامن

ہر خواب، ہر حقیقت ، ہر ارتقا کا ضامن

اب میری دسترس میں سورج بھی ہے ہوا بھی

یہ پُر کشش زمیں بھی ، وہ بے کشش خلا بھی

اب تو ہے میری زد میں ، دنیائے ما ورا بھی

پھر بھی نہ جانے کیوں میں جنگل کو اتنا چاہوں

فردوس گم شدہ کے موہوم خواب دیکھوں

آنگن میں کچھ نہیں تو ایک پیڑ ہی لگاؤں