دو نظمیں ۔۔۔ کاوش عباسی

 

وہی غم

­____________________________

 

زندگی آج بھی میرے لئے اِک چُبھتا سوال

’’آرزو کیا، مِری تقدِیر، مِری حَد کیا ہے

سِرّ تسکین و ظفر یابی کی اَبجد کیا ہے ”

 

دُور تک یاد کے خُلیوں میں سمایا ہوا اِک شخص

مِری عُمر برابر وہ مِرا عکس

چُلبلاتا سا، مچَلتا سا

وہ بچپن وہ لڑکپن میرا

بھاگتا دَوڑتا آگے ہی سَدا جاتا ہوا

ہر گلی چَوک کے ہر موڑ سے ٹکراتا ہوا

کچھ نیا پانے، نیا ہونے کی کاہِش میں سَدا کھویا ہوا

دِل سدا مچلا ہوا، تڑپا ہوا، رویا ہوا

 

پھِر مِرا عہد جوانی

نہ سنبھلتا نہ ٹھہرتا ہوا سِیماب

اِک اِک میرا قدَم ایک نیا عزم نیا باب

اِک اِک لمحہ مِرا ٹُوٹا ہوا کانچ تو ہارا ہوا خواب

وحشت و عُسرت و صد درد میں ڈُوبا ہوا

اِک لمبا سفَر، ایک ہزار اَنگ عذاب

 

آج بھی ڈھلتی جوانی میں مِری

جب مِرا بیٹا

جو اَب مجھ کو جواں لگتا ہے

جو اَب اپنے لہو، اپنے مقدّر میں

مِرے وحشت و صد درد کا

سب میرے نصابوں کا

مِرے سارے عذابوں کا اَمیں ہے

مجھے کہتا ہے

”یہ سب کیا ہے

مجھے راہ بدَلنی ہے

یہاں پر مِرا دَم گھُٹتا ہے”

تو مَیں اُس کے لئے، اپنے لئے

درد سے بھر جاتا ہوں

اَور چمَک اُٹھتا ہے دِل میں یہی اِک چُبھتا سوا

”آرزو کیا، مِری تقدیر، مِری حَد کیا ہے

سِرّ تسکین و ظفر یابی کی اَبجد کیا ہے”

٭٭٭

 

 

شہر میں تُو بھی نہیں وہ بھی نہیں کچھ بھی نہیں

­____________________________

 

شہر میں تُو بھی نہیں وہ بھی نہیں کچھ بھی نہیں

دِل مِرا دِل نہیں عاشِق بھی نہیں کچھ بھی نہیں

 

ایک بیزاری ہے جو طاری ہے سب جذبوں پر

شہر کے منظروں پر، منظروں کی باہوں پر

عِشق کی راہ دِکھاتی ہوئی شہ راہوں پر

در معشوق پہ چھوڑ آتی ہوئی گلیوں پر

صبح کی کھِلتی اُمنگوں کی جواں کلیوں پر

شام کی نرم کسَک رات کے گرم اَشکوں پر

 

مَیں کسی سمت کسی طَور نِکلتا ہی نہیں

کسی باہر کے اِشارے پہ مچَلتا ہی نہیں

 

ہاں کبھی تیرا کبھی اُس کا خیال آتا ہے

اَور دِل پیار سے ہر بار یہ دُہراتا ہے

”شہر میں تُو بھی نہیں وہ بھی نہیں کچھ بھی نہیں”

٭٭٭

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے