نظمیں
محمد طارق غازی
پیش گوئی
_____________________________
جب ہم نہیں ہوں گے تو بہت یاد کروگے
افسوس کروگے کبھی فریاد کروگے
تحریر سزاوارِ نظر بھی نہیں فی الحال
اک روز اسی بات کو استاد کروگے
وقت آئے گا جب جانوگے تہذیب کی قیمت
ویرانوں کو افکار سے آباد کروگے
لوٹاؤگے انسان کا اعزاز بالآخر
اغیار سے آنات کو آزاد کروگے
جب ٹوٹ کے بکھرے گا طلسمات تمدن
ان نکتوں سے دنیا نئی آباد کروگے
٭٭٭
سوچ کے نیم وا دریچے سے
_____________________
بند گلیاں دکھائی دیتی ہیں
زرد کلیاں دکھائی دیتی ہیں
رنگ رلیاں دکھائی دیتی ہیں
ہاں وہ شب جس میں خواب ٹوٹے تھے
عشق روٹھا تھا، ساتھ چھوٹے تھے
جتنے سچے تھے سارے جھوٹے تھے
کروٹیں نیم جاں ارادوں کی
آہٹیں کچھ ہیولیٰ سازوں کی
پیچکیں سب الجھتے دھاگوں کی
تقویٰ روئے وہاں ریا روئے
تیرگی روئے یا دیا روئے
تم نے جو چاہا وہ کیا، روئے
ستم نابکار کا غم کیوں
دشت میں شاخسار کا غم کیوں
دل ویراں بہار کا غم کیوں
غلطی کیسی، کیا پشیمانی
شہر غفلت میں کیسی حیرانی
جوئے خوں میں وہی ہے طغیانی
بے سند لفظِ مختصر بھی وہی
خوف اب بھی وہی، خطر بھی وہی
درد اِدھر بھی ہے، درد اُدھر بھی وہی
پوچھتی ہیں الم زدہ نسلیں
اب کہو قافلے کہاں بس لیں ؟
پھر بھٹک جائیں ؟ پھر کمر کس لیں ؟
رنج خوردہ زمیں سے کیا شکوہ
سجدۂ بے جبیں سے کیا شکوہ
مار کا آستیں سے کیا شکوہ
کشتگان فریب، لے آؤ
لاؤ، دامان و جیب لے آؤ
پھر اک اور نگزیب لے آؤ
سوچ کے نیم وا دریچے سے
٭٭٭