نعت رسولﷺ

تنویر پھولؔ

کشورِ شاہ مدینہؐ ہے جہانِ رنگ و نور

گنبد خضرا ہے گویا گلستانِ رنگ و نور

رحمتِ حق کی ہے بارش روضۂ سرکارؐ پر

ہیں ملائک ہر گھڑی واں پاسبانِ رنگ و نور

سبز گنبد، نورِ احمدؐ سے سدا ہے مستنیر

مسجدِ سرورؐ مدینے میں نشانِ رنگ و نور

ر شکِ صد گلزار ہے شہرِ مدینہ کی زمین

آسمانِ شہرِ آقاؐ، آسمانِ رنگ و نور

آپؐ ہیں نورِمجسم، مشک سے بڑھ کر عَرَق

گلشن شہرِ نبیؐ ہے بوستانِ رنگ و نور

اس میں ہیں نور الہدیٰ ؐ، شمس الضحیٰ، ؐ بدر الدجیٰؐ

اب بھی حجرہ عائشہ ؓ کا ہے مکانِ رنگ و نور

چودھویں کا چاند نکلا ۱؎، یہ صدا تھی چار سو

شہؐ کی آمد پر ثنا خواں کاروانِ رنگ و نور

ذاتِ آقاؐ نور ہے جس سے ملا ہے رنگِ حق ۲؎

دیکھو ! قرآنِ مبیں میں ہے بیانِ رنگ و نور

شکر ہے اللہ کا، مدحت سرا تنویر پھولؔ

ہے ثنا گوئے رسالت، مدح خوانِ رنگ و نور

۔ ۔ ۔ ۔ ۔ ۔

۱؎ طلع البدر علینا

۲؎ سورۃ البقرہ آیت ۱۳۸ اور سورۃ المائدہ آیت نمبر ۱۵

٭٭٭