دمِ دیدار می رقصم
۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔
دوش کسی پر کیا رکھتے
عشق کا دائرہ
خود گرداب میں
لہروں لہروں
نیلے پانیوں تک جاتا ہے
گلی گلی ناچیں گے
بے چہرہ، مانس
نُور کا ہالہ
تاریکی کا تُبکا
مدغم کرتا ہے اپنے میں
پینگوئن ناچ کو دیکھ
ہنسی آتی ہے
بے ڈھب، بے رنگا
بے اختیاری میں بے پر بھی ناچتے ہیں
رُوپ چوبارہ
اور اَن دیکھا
دل نظّارہ
رال ٹپکتی جسم کی دیکھ کے
موسم گلے لگا لیتا ہے
تھیا تھیا
رقص شروع ہوتا ہے
مچھلی کائی چاٹتی ہے
رُت کی صراحی ہونٹ رسیلے کاٹتی ہے۔۔۔۔
٭٭٭
فش ایکویریم
۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔۔۔ ۔۔
گھر کے
فش ایکویریم میں
مختلف رنگوں کی مچھلیاں ہیں
تمہاری یاد سے
مماثلت رکھتی ایک مچھلی
عجیب اُداسی لئے
چہار اطراف بے چین پھرتی ہے
مقید ماہیِ آب نے
جیسے تمہاری تصویر کھینچ رکھی ہو
اور آ ہستہ آہستہ
تمہارا پسندیدہ پیراہن زیبِ تن کئے
تمہاری شکل میں آتی جا رہی ھو
جدائی کا ایک اور مرحلہ پیشِ نظر ہے
اب کے
پانیوں پر جنگیں ہونے کی خبر بھی
سُرخی بنتی ہے
آبِ خواب کے مشکیزے تک
چھلنی ہونے کے بعد
مچھلیوں کی تڑپ
دیکھنے کا میلہ بھی سجنا ہے
ہم کیا
اُس میلے میں
اپنی اپنی مچھلیاں پہچان سکیں گے ۔۔۔۔؟
٭٭٭