مغنی تبسّم

غزل

مغنی تبسؔم

بیداری کے خواب گراں ہیں میرے بھی

خوابوں میں آباد جہاں ہیں میرے بھی

قیدِ مکاں سے باہر ہیں سب میرے خواب

بے تقویم نفس امکاں ہیں میرے بھی

میں نے بھی ساحل سے باندھے ہیں پیماں

بحر میں تیرے کچھ طوفاں ہیں میرے بھی

منزل منزل تیرے کرم کے ڈیرے ہیں

تپتی دھوپ میں دشتِ رواں ہیں میرے بھی

میں نے بھی کچھ رنگ بھرے ہیں خاکوں میں

کچھ منظر یاں خاک نشاں ہیں میرے بھی

تیرے بگولوں میں رقصاں ہے میری خاک

صحرا صحرا کارِ زیاں ہیں میرے بھی

***